::Historie Sjiengeleboem::

Historie Sjiengeleboem !
Zoë wie de veurpagina al duit vermoede zien weej op 1 april 1976 opgerich. Neet ônder de naam Sjiengeleboem maar as joekskepèl Boéte de Paort, ein ônderdeil van vastelaovesvereiniging Boéte de Paort. Beej kefé de Grolsch Quelle, aan de rôntônde, woorte ônder leiding van Pap Schouren, de köp beejeingestaoke um ein eige joekskepèl op te richte. En jaowaal, nao inkele waeke woort d’r met de rippetisies gestart, op instrumente die beej kefé d'n Hook in Bliërick iërs as dekorasie aan de moor hônge, en op ein paar instrumente gespônsord door Pap Schouren. Nôw, ut waas wat fijns waat daor ten gehure gebrach woort! Idder waek woort d’r driftig gerippeteerd ônder leiding van Jan de Kikker, en zoëwaar, met de vastelaovend in ’77 woort d’r al poepieloestig meigetrokke met d’n groëte optoch in de stad, prachtig oétgedos as pliessies, en met ut oétgebreide rippertoire van maar leefs twië(!) leedjes: Joetse Jatse en Wao gaon we haer! De minse aan de kant stônde met aope mônd te kiéke en umdet d’n optoch toen nog good trok had neemus in de gate det weej maar twië leedjes kôste träöte.

Optraeje op de personiëlsaovend van V&D in ut Kaetelke.

Maar, allerwiels woort ut rippertoire miër en miër oétgebreid, weej speulde inmiddels al op vastelaoveszittinge en -resepsies, woorte al gevraog um op ein broélof te träöte, en in 1980 vônde weej d’n tiéd riép um auk ens naor ut boételand te gaon.
Alzoë, det hebbe die Pruusse geweite! Ein wörkelik fien stel oét Venlo, ging naor Klotte aan de Mosel um daor ens flink de bleumkes boéte te zette op de Wienfeeste. Weej ware nog gen keteer daor toen vlooge de bedmatrasse al door de raam naor boéte! Beej de truukkôms snachs woort de feesverleechting van ut terras verwisseld met de lampe in ut hotel zoëdet d’n argeloze veurbeejganger dach det ut eine Poef waas in plaats van ein iëbaar hotel. Ut träöte verleep vaerder oétstaekend, de minse hebbe zich de auge oétgekeke det d’r nao zoëvuul beer en veural wien, nog steeds meziék oét ôs instrumentarium kwaam, en veur ôs waas ut veural joeks en jen.