::Joekskèpel Sjiengeleboem::

Joekskepèl Sjiengeleboem !
De naam Sjiengeleboem is veurtgekômme oét eine waalbekinde vastelaovesschlager van d’n hiër Sef Hendriks: Vastelaovend ( vastelaovend, sjiengele, sjiengeleboem). Vanaaf 1989 veure weej dae naam, en wie weej in 1990 gevraog woorte door Frans Maos um as hoéskepèl van ut boérebroélofsgezelschap te träöte, wis daornao geliék idderein wae Sjiengeleboem waas. Veur ôs steit nog altiéd de joeks veurop, en det is dan auk de raeje det weej allein daor träöte waor weej vuul jen hebbe. Ôs jaorliks hoëgtepunt is nog altiéd de Wienfeeste maar tössedoor hebbe weej nog einen berg andere moéje optraejes. In de vastelaovestiéd zien weej te vinde op diverse resepsies, bejaardezittinge, boéremoosbal en netuurlik auk d’n optoch in Venlo en Bliërick. Daorboéte zien weej ut ganse jaor aktief en hebbe optraejes in Munster, Pattscheidt, Köln, Düsseldorf, Brauweiler, Wursthausen, Valkenburg, Kenia, en gewoën in de stad netuurlik!

Weej halde idder waek rippetisie in Ut Tref in Venlo-zuid, en ens in de twië waeke kump Sef Gubbels, dae ôs met unnoemelik vuul gedöld probeert muzikaal ein bietje beej te schave.

Weej hebbe dan auk wörkelik deep respek veur Sef, want de snaps neet det eemus de mood op kin bringe um veur zôn stel te gaon staon en ut dan auk nog veurmekaar kriég de gansen handel netjes te laote träöte! Auk Huub en Toos van Ut Tref hebbe ut zwaor te verdure want nao de rippetisie waere d’r meistal nog inkele tuutjes beer genuttig en dan geit ut d’r neet altiéd aeve röstig aan toe.....