Historie

Weej zien in 1976 opgerich

Weej zien in 1976 opgerich door en mét leeje van Boéte de Paort en wies 1989 as joekskepèl Boéte de Paort door ut laeve gegaon. Eine moëje tiéd waor we as joekskepèl de basis hebbe gelag veur waat weej nôw gewaore zien. Beej kefé de Grolsch Quelle aan d’n rôtônde woort ônder leiding van Pap Schouren de iërste vergadering belag en alzoë ôntstônd joekskepèl Boéte de Paort. Ônder de bezielende leiding van Jan de Kikker woorte de iërste neut umgezatte in meziék (hoewaal det ein groët woord is, want vuul nobels kwaam d’r nog neet oét) en langzaam maar zeker woorte de iërste leedjes gefoemp.

Vanaaf 1990

Vanaaf 1990 gaon weej as joekskepèl Sjiengeleboem door ut laeve. Ut iërste groëte evenement as joekskepèl Sjiengeleboem waas de Boérebroélof van Frans Maos, waor weej as hoésorkes gevraog waorte. Det waas ein fantasties jaor waor we in de waeke tösse d’n boéremoosbal en boérebroélofsdinsdaag ôngeviër 35 optraejes hadde en ut meistal neet iërder dan 2 oor ’s nachs waas, veur det weej de veurdeur van Ut Tref aan d’n boétekant vast hadde.

In Ut Tref

In Ut Tref halde weej eeder waek rippetisie, en ens in de twieë waeke kump Sef Gubbels, dae ôs met unnoemelik vuul gedöld probeert muzikaal ein bietje beej te schave. Weej hebbe dan auk wörkelik deep respek veur Sef, want de snaps neet det eemus de mood op kin bringe um veur zô’n stel te gaon staon en ut dan auk nog veurmekaar kriég de gansen handel netjes te laote träöte!

Waat doon weej zoë ut ganse jaor door?

Wie gezag eeder waek rippetisie, van 1 jannewari wies 31 december. ’s Zomers halde weej rippetisies met zônder instrumente op ein terrasje örges in de stad, zoëdet weej toch ôzze kwats kwiét kinne waere. Optraejes hebbe weej gans ut jaor, ut zwaortepunt leet vanzelfspraekend in de vastelaovestiéd, maar auk boéte daen tiéd zien weej op diverse plaatse te vinde.

Ôzze naam

Ôzze naam hebbe weej ôntliënd aan eine Venlose vastelaoves-schlager oét 1956 van de gebreurs Sef en Lei Hendrickx. Beide hiëre zien al geruume tiéd neet miër ônder ôs.
Aevel hebbe weej met de echtgenoëte van d’n hiër Sef Hendrickx ein innig kôntak gehad. Jaomer genôg is mevrouw Hendrickx ôs in 2008 auk ôntvalle. Zeej waas ein ziër aimabele dame op respektabele laeftiéd, en ware zien d’r gruuëts op det weej eur beschermvrouw van ôs kepèl meugde neume.